la pédophilie, un mal qui ronge

9alelha 9olli béllehi, 3lech tjibou fessghar?
jewbettou blougha 7oula mta3 maktoub w a9dar
kifech émméla etta3jiz?? ya walla dommar
yé5i mouch fahhamna Marx?? bé9i n7ébbou na3mlou el 3ar?
wala hakka teshél 7yetna w nohrbou mellogique kima yohrob el far?
w ken el victimisation, ya wallah dommar
makch féhem fech na7ki? 7ell 9albék nechkilék, esma3ni na7kilek 3al 5onnar
w ma t9ollich je compatis, ya3tik namm , jitek notlob??
ti oskot w esma3, w 7awel tefhém , ma t5allinich nekleb
na7kilek bech tefhem, tesma3 w tet3allem
w bech ya7kiwlék 3la 7aja ma ta3refhech ma ta3malch bou l3orrif, w ta3ref ech tetkallem
w ma n7ebbekchi tebki 3leyya, 5aterni 5ir mennek, w fi sensibilité nohrob bik
eddommar 3allamni nefhem b9albi mouch bmo55i, w ma nejrich lel critique
w ma nbahbarchi bloughet ellou7, w netsabbel koll marra bel étique
9alou famma 7ajet testéhel bech na7kiw fiha, w oumour o5ra ma na3mlouch menha dialectique
ennadhareyyet hédhi fétetni, ma nest5ayelhéch stratégique
fi béli jahl w bhéma bark, ama tla33 m3aha barcha nifé9 w tménik
wini l'étique ki tel3abb b awlédhom? wala léhin kil 3ada fi hammhom?
hamm 3amlouh bidihom w nséw elli edhyouba testad, ya3tihom sa5ta tlemmhom
9allou rani 3ammek n7ebbek, ija nechrilek 7aja bnina
w chaddou fi tarkina dhlém, w raddlou ayyémou 7zina
nékou w fatt9ou men ba3dhou, w ma l9a lechkoun ya7ki leghbina
surtout ki yesma "3amm flén ma7soub ki bouna, howwa elli mrabbina"
"9adrou ghali , w me9darou 3ali, w mzeyeh yéser 3lina"
sghayyer meskin, 5af la ya7ki, w lechkoun 3ad? lommou ak el meskina?
jeyba 7ara, dhey9a 3la 5aterhom el morr, w tetdhrabb w tarja3 lettarkina
walla el bou elli marka ena el koll, w ba3di ma famma ken rabbi yo7kom fina?
ki kberr hrabb, w chadd le5lé w chabb, w bdé yefhém, w 7abb y7ebb
ama 7add ma fehmou, w chkoun bech yefhem el "3léch"?
wa9telli el 7keya aslan touja3 ama ma tet7kéch
ti howwa bidou ynassi fi rou7ou 7atta 9rib yensa
ama sa3at taghdrou w to5rej, w ma yefhemchi kiféch
complexé bettbi3a, w sérénité ma ya3ref'héch
la najjem ya7ki w la yetkallem, w za3ma ech bech y9oulou 3lih
za3ma yesm3ouh, za3ma yef'hmouh, walla  fi 9féh yadh7kou 3lih?
yetmanna ya7kiha marra w yetfarhed, wesserr kberr m3ah w rzonn 3lih
bech yefhmou quelques réactions primitives, w ma y9oulouch yé5i sa7ebna ech bih?
ti sa7ebna mridh ba3sabou, ed3iwlou rabbi bech yechfih
entouma marradhthouh, w eddenya elli thabbel el 3abd w tadh7ek 3lih
w 9addéch ibn Edem y7ess rou7ou ghrib, bin ahlou w emmélih
w kiféch t7ebbou elli t7ebbou, men ghir ma ta3ref elli y3ani fih
ama y7awel ya3mel kif'hom, bech ki yedba m3ahom ma ychokkouch fih
y7ellou jlagh'hom w yo7mou w yeftiw, w ybi3ou el 9erd w yadh7kou 3la chérih
w ki yrawwa7 l darou ye7chem mel mréya, w binou w bin rou7ou y9oul tfiiiih
yammimti winek, 5alli nechkilék, w nebki 3andek w nebkilek
3lech jebtouni w ma telhitouch beyya??
w ki tendebb sa3di ma 7assitouch beyya
béhi hakka? haw y9oulou 7alti maradheyya
93adt dima n5aff medhlém, w sa3at nwalli nebki ki louleyya
w éna en principe rajel, w echayy hédha ma yo5rojch 3leyya
w za3ma mezzelt netsamma rajel? ba3d elli sar feyya?
ommi, yezzi yfadhlék, ma tebkich 3leyya
w barra 9alou m3a99ed, akelli houma lébes, yna3mbou hal fayya
weldék tla33 5ir menhom, 7nin w yes5ef w neyytou safya, mouch el feyda fenneyya?
ommi, ommi... na7ki m3ak win mchit?? ayya béhi nest5aylék houni
w enti syedték, ech bik tadh7ek 3leyya? misélech adh7ek, ama ija fi chouni...

hatri ya chahrazed ...free association

Ech n9ollek w ech na7kilek
5ayfa la nwalli nechki mennek, ba3d ma kont nechkilek
7yéti mezyena men barra, w men de5el akkéka w barra
eddenya el barra bérda, w éna fi hmoumi cherda
na3mel ma fibélich, w eddam3a ma nwarrich
ama sa3at net9harr, w teglebni el ghossa, w ech bech na7kilék rahi 9essa
na7kilék 3alli 9alli n7ébbek, w men ba3d 9alli nkébbek?
walla ki 9alli na7mik, w men ba3d befloussi chérik?
3alli ammantou 3la rou7i, w ken sbab jrou7i?
t3ebt w faddit mennek ya ayyémi, ma fik ma yettammen w koll chayy fik féni
t3ebt men dho7ka ma nefhemhéch, dha7kouli yéser w ma fhemtech 3léch
haddenya ghaddara, w kifhom kalba
el youm y9ollek 7asbék 7léli, w men ghodwa y9ollek ya 9a7ba
w n7ebb nensa ma najjamtech, n7ebb nsadde9 ma sadda9tech
n7ebb n3ich w netnaffes, n7ebb nebra marrdhouni...
w 3lech nebra? bech nzid net3eb m3a el mordha??
ahawka ki nebda mridha m3a el mordha, nwalli 3al a9all 3la men nardha  lol
bléd schizophrènes, w ma fihéch amén
elli t9oul arneb yatla3 7allouf,
w éna t3ebt w wallit 3aycha bel 5ouf
7lemt n3ich eddenya kima fahhamni "Marcuse"
w tmannit ykounli w nkounlou une muse
ama ech yendeb bel muse w fi mo55ou "no9ba"??
mhabblettou mlahhyettou w 3amletlou chaghba
w 7atta les sentiments wallét bel kedhb wennahba
w 9oulouli hedhi mouch 3icha 9a7ba??
n7ebb nehbel, wala nhejj, n7ebb n7ess ,n7ebb n3ich
n7ebb nebza9 3alli yetrahden, w ma 3la bélich
rani marginale, ama ghir ma nwarrich
7abbit elli yefhemni bel7a99 w yensa ettfachfich
w lechkoun na7ki?? ti mahi kollha ta7ki bloughet "ettmachmich"

sa3at nsallem, w sa3at nanta9 w netkallem , w ma yhemmnich

w 3la chkoun enloum bélléhi? ti mani sé3at 7atténa nebda éna bidi, w sa3at ménich
sa3at n7ebb netza3ben w n7ess elli éna mra, w sa3at nthour w n9oul "5raa"
n7ebb nadh7ek ki lemleyka, w ki nkarrez n9oul ezzabb
ama ménich barbie bech yal3ab biha elli habb w dabb
w mani 3ad ki n9oul elli n5ammou nwalli dévergondée
yerzini fihom enchallah, ya3tihom déééé
Za3ma ghaletti ki 7abbi nchedd la3sa mel west?
walla 3la 5ater 3omri ma ta77ant w la77ast?
wala yomkon 3la 5ater nakrah ettnoufi9 wettroumiz?
wala 3la 5ater sadda9t elli ennajjem nkoun ni pute ni soumise?
hedhi heyya la solitude , ma héch fennesyen
ghallatni "Gabò" w zedni fel a7zen
w bélekchi 3la 5ater 7ké 3la zmén ghir ezzmén
wala bélikchi 7ké 3la bléd ghir jarbou3esten hhhhh
5ater houni el "antha" yelzemha la t5ammem w la t7ir
w kima 9arrawha w 3allmouha yelzemha tsir
w ykassroulha jwene77a awwel ma tebda ettir
hédhi 3ahraw hédhi 9a7ba, w lo5ra ma 3and'héch kbir
w barra hakkéka , hana kollna tay7in fi bir
7abbou ykassrouni , ydagdouni, ama 3la 9loubhom 93adt
w tawwa yezzini ma 7kit , eyyyyyyyaaaahh , tfarhadt
...
w eddenya berda, grest